Benim vezirim
Takririn mucibince muma-ileyhe tevcih eyleyesin

Şeref-yafte-i sahife-i sudur olan hatt-ı hümayun-ı übbehet-makrun-ı mülukaneleri mucebince Köstendil sancağı Yergöği muhafızlığına merbut olmak şartıyla hala Yergöği Muhafızı Salih Paşa kullarına tevcih olunmuş olmağla paşa-yı muma-ileyh uhdesinde olup bazı esbaba mebni hasılatına dest-res olamadığı ilbasan sancağının dahi yine birinin uhdesinde bulunması lazimeden olmakdan naşi bundan mukaddemce ma'iyyet-i çakeranemle Der-sa'adete gelüp bu def'a vilayeti canibine avdet eden mir-i mirandan İvranyalı Hüseyin Paşa kullarının sırb maslahatında hidmeti mesbuk olduğundan zikr olunan ilbasan sancağının dahi muma-ileyh Hüseyin Paşa kullarına tevcihi muvafık-ı irade-i seniyye-i şahaneleri ise emr u ferman şevketlü kerametlü mehabetlü kudretlü veli-ni'metim efendim padişahım hazretlerinindir

Şevketlü kerametlü mehabetlü kudretlü veli-ni'metim efendim sabıkan Anadolu Kazaskeri Köstendilli Mehmed Tahir Efendinin taka'üden arpalığı olan Tire kazasına nefy birle anda ikameti emru ferman-ı şahane buyurulub keyfiyyeti semahatlü Şeyhü'l-islam Efendi da'ileri bab-ı aliye ba-telhis ifade ve heman emri yazılub bu gün Üsküdar'a imrar olunmuş mukteza-yı irade-i şahanelerinden idüğünü iş'ar itmekten naşi hak-i pa-yı kimya-sa-yı şahanelerinden istizana vaktin müsa'adesi olmadığına mebni der-akeb lazım gelen nefy emr-i şerifi tasdir ve mübaşir ta'yin ve tesyir kılınarak bu akşam sahilhanesinden Kaldirulub Üsküdar ve Kadıköyü taraflarına imrar ettirildigi ve anda dahi eğlendirilmeyüb menfasına tesyar olunacaģı muhat-ı ilm-i alileri buyuruldukda emr-u ferman şevketlü kerametlu mehabetlu kudretlu veli- ni'metim efendim padişahım hazretlerinindir

Ta'addüd-i hükümet ahali-i beldeye bar-ı sakil olmağla umur-ı hükümet-i şer'iyyesini kendi rü'yet ve arpalığında teka'üden ikamet ve ahkâm-ı şer'iyyeyi icraya müsara'at eylemesi tekrar efendi da'ilerimiz tarafından te'kîd olunub Üsküdar ve Kadı karyesinde te'hîr ettirmeyüb mahall-i me'muresine ihrac ve isâline mübaderet oluna

Şevketlü kerametlü mahabetlü veli- ni'metim efendim ipsilandi nam hainin mütehassın olduğu Tırgovişte kasabası zabt olunmuş ve ha'in-i mersum balkan tarafına firar etmiş Ve Save nam binbaşıyı yedi sekiz yüz ademiyle Silistre Valisi kethüdası re'y u eman ile yanına celb eylemiş olduğuna da'ir Silistre Valisi Mehmed Selim paşa kullarının varid olup sürh işaretiyle ma'ruz-ı atebe-i ulya yı mülukaneleri kılınan tahriratı balasına sahife- pira yı sudur olan hatt-ı humayun -ı şahanelerinde Tırgovişte kasabasını zabt eylediklerinden mahzuz oldum lakin kethüdanın Save binbaşıya re'y verib yedi sekiz yüz adam ile yanına aldığından haz etmedim bu maddeler dikkat olunacak şeylerdir bir de düvel-i nasara konsoloslarına ve vekillerine asla bir maddede i'timad ca'iz değildir bunlar ihtar olunmak iktiza eder korkarım mukaddem dediğim vechile bunlara madde künhüyle yazılarak ta'limat verilmedi zira umum milletin isyanı ma'lumu olsa saveye i'timad etmez idi şimdi ka'im-makam ta'yin olunan gavurları dahi tamama sayar ise dahi müşkil olur bunlar tafsil üzre yazılmak lazım gelür deyu emr u ferman buyurulmuş olmağla mantuk-ı münifi rehin- i iz'an-ı ubeydanem olub umum milletin fesad ve isyanı ve cümlesinin kazıyyede ittifakları olduğu bundan akdem hin-i vuku'ında ol-vakt sudur eden irade-i seniyye-i cihan-banileri vechile etrafıyla müşarun-ileyh Silistre Valisi kullarına ve Vidin ve İbrail ve Yergöği muhafızlarına ale't-tafsil yazılmış ve muahharen kaim-makamların evamir-i aliyye ile me'muriyetleri esnasında dahi rum gavurlarının din ve devlet- i aliyye aleyhinde mürtekib oldukları enva'-ı hıyanet ve mel'anetde büyüğü ve küçüğü müttefik olduğı ve bunların hiçbirinden bİr vechile emniyyet ca'iz olmadığı ve mersumların ol vechile ka'im-makamları li-hikmetin olarak bunlara emniyyet etmemeleri dekayik -i memurin-i müşar ve muma- ileyhime bildirilmiş olduğundan gayrı bu defa işbu irade-i seniyye-i mülukaneleri vechile bi't-tekrar her birine başka başka etrafıyla tahrir ve iş'ar olunmuş idiğü muhat-ı ilm-i alileri buyuruldukda emr u ferman şevketlü kerametlü mehabetlü kudretlü veli- ni'metim efendim padişahım hazretlerinindir

Şevketlü kerâmetlü mehâbetlü kudretlü veli ni'metim efendim 
Silistre Valisi Mehmed Selim Paşa kullarının bu def'a varid olan ka'imesi me'alinde müşarun-ileyhin sarraflık hizmetinde olub bundan akdem ba'zı cünhaya mebni Rodos ceziresine nefy olunmuş olan Markar oğlu Begos zimmi ile derkar olan ahz u i'ta ve muhasebesi ala halihi kalub el-haletü hazihi iltizamat-ı deruhdesi vaktinin hululü ve mersume külliyetlü deyni olmak cihetiyle umuruna sekte iras etmemek içün mersumun her ne kadar cürm ü kabahati vaki' olmuş ise afv ü ihsan buyrularak ıtlakı hususunu iltimas ve inha etmekle verilen ferman kaydı su'al olundukda mersum kendü halinde olmayub mücerred icra-yı garaz içün milletinin esafilini tahrik ile hilaf-ı resm ra'iyyet-i patrikhaneyi basdırmak misillü harekat-ı na-becaya ibtidarına bina'en şeref-yafta-i sudur olan hatt-ı hümayun-ı şevket-makrun-ı şâhaneleri mucebince geçen sene evahir-i zilhiccesinde li-ecli't-te'dîb Rodos ceziresine nefy ü iclâsı babında emr-i ali sadır olmuş ve mersum menfasına vusul birle meks ü ikamet etdirildiğini mübeyyin varid olan i'lâm mazmunu kaydı balasına şerh verilmiş idüğü divan-ı hümayunları kaleminden derkenar olunmuş olmağla ka'ime-i mezkur manzur-ı me'ali-mevfur-ı mülukaneleri buyrulmak içün arz u takdim kılındığı muhat-ı ilm-i alileri buyruldukda emr u ferman şevketlü kerametlü mehabetlü kudretlü veli-ni'metim efendim padişahım hazretlerinindir
Benim vezirim 
Müşarun- ileyhin iltiması vechile sarraf-ı mersum afv ü ıtlak oluna

Şevketlü kerametlü mehabetlü kudretlü veli- ni'metim efendim 
Yenikapu haricinde kâin kibar-ı meşayih-i kiramdan Merkez Efendi kaddesallâhu sirruhü'l- azîz tekyesi şeyhi Ahmed Efendi da'ileri ve sa'ir fukara ve dervişan Bab-ı alilerine bir kıt'a arz-ı hal takdimiyle me'alinde İstanbul Gümrüğü  malından ba-mukabele-i nan yevmi yüz yirmi sağ akçeye mutasarrıf ve tekye-i mezkurede sakin sıgalı Aşık Hasan bi-lâ veled fevt olmuş olduğundan vazife-i mezkure mahlulünden tekye-i merkume fukarasına ayende vü revendegan ve acezeye nan-ı aziz bahası olmak üzre sadaka vü ihsân buyrulmasını niyaz ve istid'a etmiş ve kaydı ve şürût-i lazımesi ba'de'l-ihrac muktezası lede's-sual bu misillü emvâl-i mukata'at-ı miriyyeden vezayife mutasarrıf olanlardan biri fevt oldukda evlad ve zevce ve vâlideynine nısfı ve ecnebiye ikişer akçe ihbariyyesi tevcih ve kusuru hazine-mande olunmak şürutundan olub ancak istid'a olunduğu vechile tanzimi mücerred irade-i seniyye ve mübarek hatt-ı hümayun-ı inayet-makrun-i şahaneleri sünuh ve suduruna muhtac olduğu der-kenar olunmuş olmağla manzur-ı me'ali-mevfur-ı mülukaneleri buyrulmak içün arz u takdim kılınmağın tekye-i mezkure şeyh ve fukarasının istid'a ve niyazları hususunda ne vechle irade-i mekarim-ade-i cihanbanileri sünuh ve sudur buyrulur ise emr u ferman şevketlü kerametlü mehabetlü kudretlü velî ni'metim efendim padişahım hazretlerinindir
Benim vezirim
Bu misillu şeylere müsa'ade iktiza etmez şurut mucibince hazine-mande oluna

Şevketlü kerametlü mehabetlü kudretlü veli-ni'metim efendim Der-sa'adette dergah-ı ali yeniçerileri meydanı içinde lahm ta'yinatı verilegelen sekiz aded tomruklardan sarı manol tomruğunda ba-berat-ı ali gedüklü tomrukcu olan Tarandafil veled-i Sebetto nam  zimmi mürd olduğundan zikr olunan tomrukculuk oğlu Dimitri veled-i Tarandafil zimmiye ber-muceb-i şurut tevcih ve yedine mu'tad-ı kadimi üzere berat-ı alişan i'ta buyrulmasını yeniçeri ağası kulları arz etmiş ve kayd u nizamı keyfiyyeti su'al olundukta tomrukculuk-ı mezkur ba-berat-ı ali halik-i mersumun üzerinde olduğu ve bu makule mu'afiyyeti müstelzem hizmetlerin mahlulden intikali ve ol-vechile berat i'tası mutlaka irade-i seniyye-i mülükaneleri suduruna mütevakkıf idüğü derkenar olunmuş olmağla arz-ı mezkur manzur-ı me'ali-mevfur-ı şehr-i yarileri buyrulmak içün arz u takdim kılındığı muhat-ı ilm-i alileri buyuruldukta emr u ferman şevketlü kerametlü  kudretlü veli- ni'metim padişahım hazretlerinindir 
Benim vezirim
Yeniçeri ağasının arzı mucebince halik-i mersumun oğluna tevcih olunub yedine mu'tad üzere berat virile 

Şevketlü kerametlü mehabetlü kudretlü veli-ni'metim efendim

Valid-i macid-i kesiru'l-mahamidleri cennet-mekan firdevs-i aşiyan merhum sultan Abdulhamid han efendimizin evkafı mukata'atından Mora ceziresinde  vakı' Balya badra mukata'ası hin-i vakfiyetden beru ba-hatt-ı hümayun-ı şevket-makrun serbest olub cemi' tekalifden mu'af iken ikiyüz yedi tarihinde  mu'afiyet kaydı ba-hatt-ı hümayun terkin olunarak mu'af ve ğayr-ı muaf siyyan olarak  tekalif i'ta eylemeleri babında mu'ahharan emr-i ali sadır olmuş ise de mukata'a-i mezkurenin mu'afiyyeti muhdes olmayub ahalisi yedlerinde hutut-ı hümayun ile müveşşeh evamir-i aliyye mevcud olmağla kadimi üzere evamir-i aliyye-i mezkurenin tecdidi ahali tarafından ba arz ve mahzar istid'a olunmuş olduğunu mütevelli-i vakf ba-takrir inha itmekle kuyud-i lazimesi ba'de'l-ihrac keyfiyyeti mora nizamı vikayesine me'mur Azmi efendi kullarından isti'lam olundukda mukata'a-i merkume fi'l-asl serbest  olan mukata'atdan değil ise de hîn-i vakfiyette mu'afiyet üzere kayd olunmuş olmakdan naşi ber-vech-i istid'a serbestiyet-i muafiyetlerinin ibkası hususunu re'y-i aliye havale ile i'lam eylediği manzur-ı şahaneleri buyrulmak içün ma'ruz-ı atebe-i  ulya-yı mülükaneleri kılındığı muhat-ı ilm-i alileri buyruldukta emr u ferman şevketlü kerametlü mehabetlü kudretlü veli-ni'metim efendim padişahım hazretlerinindir

Manzurum olmuştur mukata'anın serbest ve mu'âfiyetinde vakfa faide yoktur şimdi bunun sırası değildir

Şevketlü kerametlü mehabetlü kudretlü veli-ni'metim efendim Uzunca abad Hasköy kazasına tabi Kuru çeşme karyesi re'ayasının takdim eyledikleri bir kıt'a arz-ı halleri mefhumunda re'aya-yı merkume karye-i mezkurede vaki' derbendi muhafaza ve ol-havalide olan köprüleri ta'mir etmek şartıyla derbendci ve köprücü ta'yin olunup cizyeden ma'ada'  a'şar-ı şer'iyyelerin hass tarafına ve maktu'ların dahi kabzına memure  eda eylediklerinden sonra avarız ve nezel ve tekalif-i sa'ire ile ta'addi ve rencide olunmamaları babında yedlerinde olan emr -i alinin te'kidini havi  bir kıt'a emr-i şerif i'ta buyurulmasını tahrir ve istirham iderler kaydı lede's- su'al vech-i muharrer üzre  mu'afiyetlerini mukaddem tarihle yedlerinde olan emr-i ali ikiyüzbeş senesi evahir-i cemaziye'l evvelisinde tecdid olunmuş idüğü derkenardan müsteban olmağla manzur-i adalet-nüşur-i cihan-banileri buyurulmak içün merfu'-ı atabe-i bülend-mertebe-i mülukaneleri  kılındığı muhat-ı ilm-i alileri buyruldukta emr u ferman şevketlü kerametlü mehabetlü kudretlü veli-nimetim efendim padişahım hazretlerinindir
Benim vezirim re'aya-yı mersume yedlerinde olan emr-i ali tecdid oluna

Şevketlü Kerametlü Mehabetlü Kudretlü Veli-ni'metim efendim
Cebe-hane-i amireleri kitabeti münhal olub hâcegân-ı divan-ı hümayunları kullarından birine tevcihi icab etmekten naşi münasibi bi'l- mülâhaza çend nefer kullarının isimleri bir kıt'a pusulaya derc ve terkım ve hak-i pa-yı hümâyûnlarına takdim olunmağın kanğı kullarına tevcihi irade ve ferman buyurulur ise celb ve hil'at-ı lâzimesi ilbas olunacağı muhât-ı ilm-i âlileri buyuruldukta emr u ferman şevketlü kerametlü mehabetlü kudretlü veli- ni'metim efendim padişahım hazretlerinindir

• Şevketlü kerametlü mehabetlü kudretlü veli-nimetim efendim
  Fe hamden sümme hamden yümn-i himem-i seniyye-i şahaneleriyle işbu sene-i mübarekede eda-yı fariza-i hacc olunmuş olduğundan bu inayet-i aliyye-i cenab-ı bari cümle ümmet-i Muhammediyyeye ba'is-i enva-ı ibtihac u sürur olmak mülabesesiyle böyle hengam-ı meserret ü şadîde ıydeyn misillü top şenliği ile , icra-yı resm-i şad-maniye ibtidar lazimden olduğuna mebni üç gün top şenliği ile izhar-ı şad-mani ve meserret olunması muvafık-ı irade-i seniyye-i mülukaneleri ise icrasına ibtidar olunacağı muhat-ı ilm-i alileri buyuruldukda emr u ferman şevketlü kerametlü mehabetlü kudretlü veli-ni'metim efendim padişahım hazretlerinindir

  
  
• 
  

  
  

Şevketlü kerametlü mehabetlü kudretlü veli-nimetim efendim
Nakl-i hümayun-ı meymenet-makrun-ı şahaneleri vuku'ında tebrik ve tehniyyet zımnında mübarek rikab-ı kamer-tab-ı cihandarilerine ruh-sude olmak resm-i kadim-i saltanat-ı seniyyelerinden olduğuna mebni bu defa Beşiktaş sahil-sara-yı behcet-efzasına vaki' olan nakl-i hümayun-ı meymenet-makrun-ı tac-darilerinin icra-yı lazime-i tebrikiyle ifa-yı mukteza-yı ubudiyyet içün ,ber-mu'tad semahatlü Şeyhülislam Efendi da'ileriyle bi'l-ma'iyye kangı gün rikab-ı müstetab-ı mülukanelerine rü'esay olmaklığa izn ü ruhsat-ı seniyye-yi şehriyarileri erzani ,buyurulur ise emr ü ferman şevketlü kerametlü mehabetlü kudretlü veli-nimetim efendim padişahım hazretlerinindir

El-emr u kema zukira fihi azze ve şanuhu 

Nemekahu el-fakir İbrahim en-na'ib-i bi-mahkeme-i Davut Paşa 

Ufiye anh

İş bu derun- ı suret-i berat-ı alişanda mesturu'l-ism Şeyh Abdullah veledeş sakin-i Sofya mahallinde meclis-i şer'a gelüp şöyle takrir-i kelam ider ki , Filibe Nezareti mukata'ası malından olmak mutasarrıf olduğu yevmi altı akçe vazifesinden bin ikiyüz otuz senesine mahsuben bir senede müctemi' olan vazifesini mukata'a-i mezbur emini fahru'l-eşbah  ( boş ) ağa yedinden bi't-temam ahz u kabz eyledim deyu cevab eyledikte ma-hüve'l-vakı' bi't-taleb ketb olundu 

Şuhudu'l-hal

Ali bin Süleyman

Hüseyin bin Osman

Ömer bin Ya'kub

Ve ğayruhum

Dergah-ı felek-medar ve bargah-ı gerdun-iktidar türabına 'arz-ı bende-i bi- mikdar bu dur ki

Bu kulları ba-berat-ı şerİf-İ alişan idare-i hizmet dizdarlığı ile me'mur olduğum medine-i Ayıntab kal'asının emr-i muhafaza  ve hizmet-i lazimesinde tıbk-ı  me'muriyetim üzre mukim olub bi- kazail'lahi te'ala ve bi- kaderihi iş bu sene-i mübareke-i mah-ı zi'l ka'de-i eş-şerifesinin  yirmi yedinci gecesi belde-i mezburede vuku'a gelen zelzele-i azimeden kal'a-i mezkurede dahi ziyadesiyle vuku'a gelüb derununda olan büyut külilliyen münhezim ve altında kalan ahalisinden nice rical ve nisa' ve sıbyan helak ve mecruh ve nefs-i kal'anın burc ve baruları dahi münhezim ve harab olmağla bu babda irade-i aliyye ne güne ta'alluk buyurulacağı içün ifade-i hal lazime-i gerden-çakeriyyetim olduğuna bina'en vuku'-ı hal paye-i serir-i a'laya arz ve i'lam olundu baki emr u ferman der-adlindir

Bende-i Ali Ser-bölük-i kal'a hala

Bende-i Mehmed ser-bölük-i kal'a hala

Bende-i Hacı Ali topçu-i kal'a hala

Bende-i Hüseyin harbe-dar-ı kal'a hala

Bende-i  Ramazan katib-i kal'a-i mezkur hala

Bende-i Mehmed şeyh-i imam-ı kal'a-i mezkur hala

Bende-i Seyyid Sübhan verdi kethüda-yı kal'a hala

Bende-i Seyyid Ahmed Emin dizdar-ı kal'a-i Ayıntab hala

Kaim-makam Paşa

Bi-işaret-i tarik-i kazadan ve su'-i hareketine mebni cezası verilen Osman nam kimesnenin muhallefat ve nükud ve zimematına da'ir müfredat defteri ve defterdarın takriri manzur ve ma'lumum olub , rehin olan bilezik ba'de's- sübut sahibine redd oluna iki re's arab cariyeyi validesine hibe etmiş ,etmemiş validesine virile ve diğerlerinin azadlı olduğu ma'lum olduğu takdirce keyfe ma yeşa'  ve yahtar ta'dad olunan ma'lumu'l-mikdar nukudu canib-i miriye teslim olunub validesi sandığından zuhur eden meblağdan bin üçyüz otuz guruş nakden validesine verilip üçbin  guruşuna bedel beşyüz  guruşlu sehm ka'imesi validesine virile ba-temessük ve ba-defter zimematı  tahkik ve taharri olunarak tahsil olunub bakkal dükkanı gediği dahi füruht oluna kaldı ki validesi uhdesinde olan emlaki tenkıha muhtac olmağla el- yevm  sakin olduğu hanesi vaz'ı yed olunmayan eşyasıyla  validesinde  ibka olunub ma-a'da menzil ve dekakin ve bostan ve sa'irin senedatına imrar-ı nazar ve evkaf-ı mütevelli ve katib ve cabilerini ihzar ve tarihlerine dikkat olunarak zikr olunan emlaki validesi ne vakit   almıştır mu'accelerini kendisi mi vermiş oğlu mu harice ihrac eğerçe oğlunun büluğundan mukaddem  tarihle emlak-i mezkurede mutasarrıf olduğu var ise kendüye ibka ve senedatı redd oluna oğlunun büluğundan sonra alub validesi üzerine senet ettirdikleri füruht olunub miriye ahz oluna ve maktul-i mezkurun seddü'l- bahirde yanında buluna eşya ve nukud takrir mucebince emri virile ve validesine müte'allik olan eşyasına ta'arruz olunmamış ise de oğlu eşyasından dahi ba'zı nisa taifesine cesban olan avani-i nühas ve sa'ir hurdevat-ı menzile makulesinden bir miktar şey' virile.

Benim Vezirim

Çatalca Nahiyesi'nde Sürgün karyesi'nde re'aya kenisalarını ta'mir etmişler deyu Çatalca Nâibi i'lam itmekle ka'im-makam Paşa tashihi içün bir ferman yapdırub mühürdar yamağıyla göndermiş,ol-tarafda mu'ayene olunmuş fi'l hakika sahih imiş ve re'aya izinsiz yapmışlar deyu tekrar i'lam ve on kise akçe mühürdar yamağına hidmet vermişler  ben size izn'-i fermanı yaptırdım deyu tekrar tekrar re'ayadan on kise dahi almış na'ibi ve zabiti karyenin koca başılarını Haseki mübaşeretiyle ihzar ettirdim bostancı başı tarafında mahbusdurlar na'ibin takririni aldırıp tarafına gönderdim re'aya biz izinsiz yaptık deyu ikrar ederler imiş amma izinsiz cesaret edeceklerine akıl kesmaz her ne ise madem ki fermansız yapılmış şimdi mübaşir ve mi'mar ta'yin eyleyüb kenisayı külliyen hedm  ettirdesin ve bunları bostancı başı ma'rifetiyle istintak ettirüb hakikatte kimsenin haberi olmaksızın re'aya mı cesaret idüb yapmışlar yoksa na'ib ile karye zabitinin haberleri var mı iyice tahkik idüp taraf-ı hümayunuma haber viresin zira bu bir tarihte olmuş şey değildir bu maddede cürmü olanlar te'dib olunmalı ki sa'ire ibret olsun.

Zahire Nazırı İzzetlu Efendi
İş bu rikab-ı kamer-tab-ı hüsrevaniye takdim olunan 'arz-ı hale im'an-ı nazar birle keyfiyyeti huzurumuza i'lam eyleyesin deyu buyuruldu
Fi gurre-i Z sene 36

Sahh

Telhis mucebince divandan emri tahrir ve baş muhasebeye ka'imesi virilmek buyuruldu 19 RA Sene 757

Der-i devlet-mekine 'arz-ı 'abd-ı da'i-i kemineleridir ki 

Kasaba-i Doyran'da vakı' kavm- yehudiyan ba-cem'ihim meclis-i şer'a gelüp şöyle takrir-i kelam ve ta'bir-i 'ani'l-meram iderler ki ,kasaba-i merkumede vakı' kadimden ma'bedhanemiz olan havramız bundan akdem vakı' olan ihrakta bi'l-külliye muhterik ve harab ve ma'il-i türab olup fakat cidarları kalmağla derununda icra-yı 'ayin-i din ü Musa ve tilavet-i Tevrat gayr-ı sahih mümkün olmayup ta'mir ve termime muhtac olmağın uslub-ı sabıkı üzre vaz'-ı kadiminden bir nesne ziyade etmeksizin ta'mir ve termimine izin verilmek recasına Der-i Devlet-medara 'arz ve i'lam ideyor deyu ilhah ve ibram etmeleriyle ba'de'l-keşf ,tulu on bir zira' ve 'arzı on zira' ve kaddı sekiz zira' olup havra-i merkume ber-vech-i muharrer ta'mire muhtac olduğu keşf ve mu'ayene olunup ,kadim olduğu dahi müsliminden mevsuku'l-kelim kimesneler ihbar etmeleriyle evvelki vakı'u'l-haldir .Bi'l-iltimas saye-i serir-i  a'laya 'arz ve i'lam olundu .Hurrira fi'l-yevmi's-sabi' 'aşera min şehr-i cumade'l-ahire li-sene sitte ve erba'in ve mi'eteyn ve elf 

El-'abdü'd-da'i li'd-devleti'l-'aliyyeti'l- osmaniyye Süleyman el-kadı bi-kaza-i Doyran

Vakı' olan teveccühatı Evkaf-ı Hümayun Müfettişi Efendi ma'rifetiyle lede'l-imtihan Evkaf-ı Hümayun Nazırı sa'adetlü atufetlü efendi hazretlerinin 'arz ve i'lamlarıyla tanzim olunmak ba- irade-i seniyye meşrut ve nizamından idüğü ma'lum-ı devletleri buyuruldukta emr u ferman devletlu sa'adetlu sultanım hazretlerinindir 

DİVANİ HATTI MÜFREDAT MEŞKLERİ

RİK'A HATTI MÜFREDAT MEŞKLERİ

Ka'im-kamam Paşa

SelimPaşa'nın azli ve Şerif Paşa'nın nasbı içün taraf-ı mülukaneme telhis eylemiş idin , gerçi azline müsa'ade-i hümayunum olmuş idi ,ancak ba'zı mahallerden ehliyeti olduğu mesmu'-ı şahanem olmuşdur .Bir kerre gereği gibi taharri ve tecessüs olunarak maddeye vakıf olasın ,fi'l-hakıka ahalisi ile hoş hal midir yohsa sahte bir şey midir ,ve'l-hasıl ıttıla'-ı tamm ile ma'lumun oldukta nasıl iktiza eder ise taraf-ı şahaneme arz ve ifade eyleyesin

                                                                    

Benim Vezirim

Bu işlerin bitmesi murad-ı şahanemdir .Nasıl münasib görüyor isen öylece idesin,lakin bu tertib mukaddem olaydı olmaz mıydı ,defter emaneti kangı ademe elyak ve enseb ise nasb idesin ,Kapudan Paşa'nın azimetini zikr ederek dünkü gün taraf-ı hümayunumdan hatt irsal eylemiştim ve bu me'muriyyeti 'aleme şayi' olup şimdi yine ahar suret kesb eylediği surette yine bir kıyl u kali mucib bir madde olacağı anlaşılur .Paşa bu maddeyi bir rabıta tahtına idhal iderek bir hüsn-i suretiyle nizam ve intizamına mübaderet eyleyesin.Göreyim seni.

 Ma'ruz-ı da'i-i Devlet-i Aliyyeridir ki

Lisan-ı emr-i sami-i hazret-i veliyyu'n-'ni'amiye imtisalen Kartal kazası dahilinde ber vech-i bala kura ve kasabanın muhtar ve mu'temedlerinden mesturu'l -esami kimesneler ba'del-ihzar kaza-i mezbur mahkemesinde  meclis-i şer'-i serif-i  enverde husus-ı atiyü'z-zıkre mübaşır ta'yin olunan silahşoran-ı hassadan mir Mehmed Ragıb bendelerİ hazır olduğu halde ber- muceb-i fermude her biri ikrar-ı tamm ve takrir-i kelam edip bi'l-ahare terkim olunan ma'lumu'l-esami  sakin olduğumuz karyelerin kaffe-i sekenesinin bila tezkire bir tarafa gitmeyeceklerine ve içlerimizden hılaf-ı rıza hareket etmeyeceklerine ve hılaf-ı emr-i ali hareket eden olur ise der- akab zabıtan tarafına haber verilmesi hususunda zerreten ma Tecviz-i tehavün ve kusur olunmayacağını mübeyyin ber-vech-İ meşruh birbirlerimize kefil olduğumuzu mu'ayyen kefalet-namemizi hala Anadolu eyaletine ve Bahr-ı Siyah boğazının Anadolu canibi muhafazasına  saye-endaz-ı übbehet ve iclal olan devletlu merhametlu veliyyü'n-ni'am Hüsrev Paşa Efendimiz hazretlerine arz eyle deyu istid'a eyledikleri asafanelerine arz ve i'lam olundu .El-emr u li-menlehü'l-emr .Fi'l-yevmi's-sabi' min şa'bani'l-mu'azzam li-sene isneteyn ve erba'in ve mi'eteyn ve elf 

El-abdü'd-da'i li'd-devleti'l aliyyeti'l-ebediyyeti'l-osmaniyye Yenişehirfenari İbrahim  el-müvella hilafe bi-nahiye-i Adalar 

Ma'ruz-ı da'i-i Devlet-i Aliyyeleridir ki
Süleymaniye cami'-i şerifi havlisinde ka'in tahta medrese sakinlerinden olub el-an bab-ı cenab-ı ser-askeride mahbus olan talebeden Geredeli Halil nam şahıs talebe-i uluma gayr-ı layık hilaf-ı rıza ba'zı harekat-ı na-revaya İctisarı sebebiyle merkumun li-ecli't-te'dib İznikmid kazasına nefy ü iclası babında ferman-ı alileri mercudur  el-emr u li-men lehü'l- emr. Hurrire Fİ'l-yevmi'l hâmis min Saferi'l-hayr li-sene hamse ve hamsin ve mi'eteyn ve elf
Ed-Da'i Mekki-zâde Mustafa Âsım 
Ufiye anhuma

Veliyyü'n-ni'metim Devletlu 'İnayetlu Efendim Hazretleri
Dünkü gün kararı tahrir ile taraf-ı devletlerine teslim olunan Ka'imelerin üzerinde Hatt-ı hümayun olduğundan elde gezmesi münasib olmamağla Hatt-ı hümayun ile mu'anven ka'imeler malikanede hıfz ile tekrar ka'imeler tahrir ittirilmesi istisvab olunduğu ma'lum-ı devletleri tebdil ve yine taraf-ı devletlerine tesyir olunmak üzre tevkıf olunan ka'imelerin irsali hususunda inayet efendim hazretlerinindir